35 гадоў таму ў Польшчы падпісана знакавае пагадненьне

Сёньня ў Польшчы адзначалася 35-я гадавіна падпісаньня Шчэцінскага пагадненьня. Яно было адным з трох, якія завяршылі ў 1980 годзе масавыя страйкі.

Прэм’ер-міністар Польшчы Эва Копач, старшыні Сэйма й Сэнату ды іншыя палітыкі кіруючай партыі «Грамадзянская плятформа» не былі запрошаныя на афіцыйныя мерапрыемствы з нагоды юбілею. Яны ўшанавалі гадавіну гістарычнай падзеі, усклаўшы кветкі да будынка Шчэцінскай суднаверфі, за дзьве гадзіны да пачатку афіцыйных мерапрыемстваў.

Афіцыйныя ўрачыстасьці з набажэнствам прайшлі ў Шчэціне пры ўдзеле прэзыдэнта Польшчы Анджэя Дуды, кіраўніцтва й прадстаўнікоў прафсаюза «Салідарнасьць» ды палітыкаў апазыцыйнай партыі «Права й справядлівасьць». Такім чынам чарговы раз праявіліся сур’ёзныя трэньні паміж партыямі «Грамадзянская плятформа» ды «Права й справядлівасьць».

30 жніўня 1980 года на Шчэцінскай суднаверфі ўлады ПНР падпісалі пагадненьне з прадстаўнікамі прадпрыемстваў рэгіёну, ахопленых страйкам. Большасьць патрабаваньняў мелі сацыяльна-эканамічны характар, і яны, дарэчы, актуальныя па сёньняшні дзень.

вс