Варшавa заяўляе аб стварэньні расейскамоўнага каналу

Ініцыятарамі стварэньня расейскамоўнага тэлеканалу выступаюць Галяндыя і Польшча, заявіў міністар замежных спраў Польшчы Гжэгаж Схэтына.

Польшча плянуе правесьці 10 верасьня ў Варшаве канфэрэнцыю міжнародных донараў па стварэньні расейскамоўнага тэлеканалу ў Эўропе, заявіў у панядзелак міністар замежных спраў Польшчы Гжэгаж Схэтына падчас знаходжаньня ў Брусэлі.

Новы канал будзе скіраваны на гледачоў ў Расеі і расейскамоўных меншасьцяў у краінах Усходняй Эўропы.

Як падкрэсьліў Гжэгаж Схэтына, гэта будзе цалкам новы праект.

"У ім ня будзе мовы прапаганды, агрэсіі, ён будзе несьці праўдзівую, дакладную інфармацыю", - сказаў міністар. Ён дадаў, што новы праект
будзе дапаўненьнем для ўжо існуючых СМІ Ўсходняй Эўропы.

Паводле словаў міністра, запуск расейскамоўнага тэлеканалу, які з Польшчы будзе падаваць эўрапейскі пункт гледжаньня, магчымы ў 2016 годзе.