„LOT” страціў пазыцыю лідара на польскім авіярынку

„LOT” страціў сваю лідыруючую пазыцыю на польскім авіярынку. Польскія дзяржаўныя авіялініі праігралі ірляндзкай бюджэтнай авіякампані „Ryanair”. Сёлета польскую авіякампанію плянуе апярэдзіць таксама вугорскі авіяперавозчык - „Wizz Air”, які толькі што дэбютаваў на Лёнданскай фондавай біржы.

У мінулым годзе „Wizz Air” перавёз амаль 14 мільёнаў пасажыраў, а паслугамі „Ryanair” скарысталіся ажно 86 мільёнаў 400 тысячаў чалавек . Хоць у глябальным маштабе кампаніі „Wizz Air” яшчэ далёка да „Ryanair”, то ў Польшчы яны праводзяць сапраўдную бітву за кліентаў.

Пакуль перамагае „Ryanair”, які ў 2013 годзе быў самым буйным перавозчыкам у Польшчы й выйграў з вугорцамі цэнавую вайну ў аэрапорце „Модлін” ля Варшавы. І хоць кампанія „Wizz Air” была прымушана пераехаць на лётнішча „Шапэна” ў Варшаве, то, па-ранейшаму, мае вялікія пляны адносна Польшчы.

Пакуль вугорцы – гэта трэці авіяперавозчык у Польшчы. Дадзеныя Офіса грамадзянскай авіяцыі за першы квартал мінулага году сьведчаць пра тое, што паслугамі вугорскіх авіялініяў скарысталіся 3 мільёны 415 тысячаў пасажыраў.

„LOT” знаходзіцца на другім месцы – 4 мільёны 484 тысячы пасажыраў. Але з-за дзяржаўнай дапамогі нацыянальны авіяперавозчык мае абмежаваныя магчымасьці разьвіцьця. Да канца кастрычніка кампанія павінна быць рэарганізаваная, а новыя маршруты можа адкрыць толькі ў будучым годзе.

Між тым, „Ryanair” і „Wizz Air” могуць выбіраць сярод шматлікіх прапановаў польскіх аэрапортаў. Цяпер „Wizz Air” карыстаецца пяцьцю аэрапортамі: ў Гданьску, Познані, Катавіцэ, Варшаве і Ўроцлаве. Самалёты вугорцаў лётаюць таксама зь Любліна й Шчэціна. Агулам у Польшчы „Wizz Air” прапануе рэйсы па 107 маршрутах.

аз