Польшча пашырае супрацу з Паўднёвай Карэяй

Паўднёвая Карэя - гэта другі па велічыні эканамічны партнэр Польшчы ў Азіі. Гэта таксама найбуйнейшы азіяцкі інвэстар у Польшчы.

Таму палякі актывізуюць супрацоўніцтва з гэтай краінай. З гэтай мэтай надоечы ў сталіцы Паўднёвай Карэі Сэуле адбылося падпісаньне адпаведнага дакуманту па гэтым пытаньні.

У мінулым годзе прэзыдэнты Польшчы й Паўднёвай Карэі прынялі дэклярацыю аб стратэгічным партнэрстве абедзьвюх краінаў.

Цяпер польскі амбасадар у Сэуле Кшыштаф Майка й намесьнік міністра замежных спраў Паўднёвай Карэі Лі Гюн Су падпісалі плян дзеяньняў па супрацоўніцтве паміж дзьвюма краінамі, - паведаміла Яанна Васеўска, кіраўнічка палітычнага й эканамічнага аддзелу Амбасады Польшчы ў Сэуле.

Яанна Васеўска: Польшча й Паўднёвая Карэя дамовіліся наконт правядзеньня эканамічных кансультацый, а таксама супрацы на палітычным узроўні, у галіне навукі, культуры й тэхналёгій.

У гэтым годзе ў Пусане прадстаўнікі Польшчы й Паўднёвай Карэі падпісалі дакумэнта аб супрацоўніцтве ў галіне сучасных інфармацыйных і камунікацыйных тэхналёгій.

Польскі бок спадзяецца, што Паўднёвая Карэя яшчэ больш заангажуецца ў польскія праекты галіны сучасных тэхналёгій.

аз