Плянуецца разбудова газапорту ў Сьвінауйсьці

„Polskie LPG” – фірма, якая рэалізуе праект будаўніцтва тэрміналу звадкаванага газу ў Сьвінауйсьці (узьбярэжжа Балтыйскага мора), ды польскі дзяржаўны нафтагазавы канцэрн PGNiG падпісалі ліст аб намерах адносна супрацы па разбудове тэрміналу. Дадаткова бакі бяруць пад увагу інвэстыцыі, якія ў будучыні дазволяць на перагрузку паліва з буйных танкераў на меншыя судны, пастаўкі „блакітнага паліва” ў іншыя тэрміналы, а таксама запраўку суднаў.

Адной з ключавых тэмаў перамоваў будзе магчымасьць будаўніцтва трэцяга газасховішча. Нагадаем, у межах цяперашняй інвэстыцыі будуюцца два газасховішчы, якія дазволяць прымаць каля 5 мільярдаў кубамэтраў газу ў год.

На сёньня Польшча выкарыстоўвае каля 15 мільярдаў кубічных мэтраў газу ў год. У выніку разбудовы тэрміналу палякі змаглі б атрымліваць каля паловы сваіх патрэбаў на газ амаль з усіх куткоў сьвету, дзе вырабляецца звадкаваны газ.

Аднак магчымая разбудова тэрміналу зьвязаная з адтэрмінаваньнем яго здачы ў эксплюатацыю да сярэдзіны будучага году. Гэта для канцэрну PGNiG немалая праблема. Паводле заключанай раней дамовы, цягам бліжэйшых 20 гадоў канцэрн „Qatargas” павінен паставіць у Сьвінауйсьце 1,5 мільярдаў кубамэтраў газу ў год. Першы танкер павінен прычаліць у польскі порт на пачатку 2015 году. Цяпер польскі бок праводзіць перамовы адносна зьмены графіку паставак катарскага паліва.

Паводле экспэртаў, ліст аб намераx, падлісаны фірмай „Polskie LPG” і канцэрнам PGNiG, — гэта крок у слушным напрамку. Тэрмінал у Сьвінауйсьці мае шанец стаць рэгіянальным лідарам па пастаўках альтэрнатыўных крыніцаў энэргіі.

аз