Варшаўскія ЦЭЦ зьбіраюць сьвяточныя елкі

Улады Варшавы хочуць выкарыстаць прынамсі частку сьвяточных елкаў, якія яшчэ некалькі тыдняў таму ўпрыгожвалі кватэры, а цяпер трапляюць на сьмецьце.

Да канца месяца жыхары Варшавы могуць аддаць сваю елку ў варшаўскія цеплаэлектрацэнтралі.

Кожны дзень у іншым раёне Варшавы будуць падстаўляцца спэцыяльныя кантэйнеры, у якія можна кінуць елку.

Віцэ-мэр сталіцы Яраслаў Дамброўскі кажа, што Варшава мае амбіцыі стаць экагорадам і атрымліваць энэргію з аднаўляльных крыніц.

Сабраныя елкі будуць перададзеныя на варшаўскія ЦЭЦ. Там іх пасартуюць й спаляць у кацельнях. Атрыманая такім чынам электраэнэргія й цяпло будуць выкарыстаныя для ацяпленьня кватэраў ды падагрэву вады.

У мінулым годзе ў выніку падобнай акцыі ўдалося сабраць каля 400 тон елак. Зразумела, гэта сымбалічная колькасьць, паколькі ў варшаўскіх ЦЭЦ штогод спальваецца каля 54 тысячаў тон біямасы.

Сёлетняя акцыя будзе працягвацца да канца месяца.

аз