Расейцам зноў не падабаецца польская садавіна

Польшча дасьледуе справу садавіны затрыманай нядаўна расейскімі фітасанітарнымі службамі. Расейскі бок заяўляе, што ў 44 тонах яблыкаў і грушаў пэстыцыды й нітраты перавышаюць дапушчальныя нормы. Спрэчны тавар праўдападобна паходзіць з Мазоўша. Увогуле 70% экспартных садавіны й агародніны вырошчваецца менавіта ў гэтым рэгіёне. Ваявода Мазоўша Яцэк Казлоўскі заявіў, што адпаведныя службы дасьледуюць справу.

Я.Казлоўскі: Мы вельмі дакладна прааналізуем гэты выпадак. Мы імкнемся высьвятліць, ці памылка сапраўды знаходзіцца на польскім баку, ці магчыма, так як у выпадку мяса, фальсыфікацыя пячатак адбывалася не на польскай тэрыторыі.

Расейскі бок папярэдзіў аб завастрэньні праверкі польскіх тавараў у сувязі са шматлікімі закідамі. А польскія ўлады здаўна стараюцца пераканаць расейцаў, што польскія вытворцы прытрымліваюцца нормаў.

Ваявода адзначыў, што нядаўна амбасадар Расеі асабіста назіраў за працэсам экспэедыцыі тавару ў Расею. Наведаў фітасанітарную лябараторыю, таксама быў сьведкам, як у Гарвалінскім павеце садаўнік грузіў яблыкі на экспарт у Маскву.

Яшчэ на гэтым тыдні заплянавана сустрэча польскіх і расейскіх службаў па інспэкцыі прадуктаў харчаваньня.

яс