Новы безрэцэптурны пералік лекаў

Міністэрства аховы здароўя Беларусі пастановай нумар 15. зацьвердзіла абноўлены пералік лекавых сродкаў, якія рэалізуюцца без рэцэпта.

Абноўлены пералік уключае больш як 2 тыс. назваў лекаў - прыкладна столькі ж было і ў папярэднім безрэцэптурным сьпісе.

Усяго ў Беларусі на гэты момант зарэгістравана амаль 6 тыс. назваў.

Што датычыць лякарстваў, што адпускаюцца ў аптэках без рэцэпта, то яны прызначаны для адказнага самастойнага лячэньня й аказаньня першай мэдыцынскай дапамогі.

Аднак, як падкрэсьліваюць у прэс-службе Мінздароўя Беларусі, абсалютна бясшкодных лякарстваў няма, таму пры выбары прэпарата зь безрэцэптурнага пераліку трэба зьвярнуцца па кансультацыю да правізара. У аптэцы растлумачаць, пры якіх сымптомах можна прымяняць лякарствы, прызначаныя для самадапамогі й самапрафіляктыкі, а пры якіх неабходна ісьці да ўрача.

Як паведамлялася раней, з 1-га ліпеня 2012 году Міністэрства аховы здароўя ўзмоцніць кантроль за выпісваньнем рэцэптаў і водпускам лякарстваў з аптэк.

Набываць прэпараты, якія ў пералік свабодных да продажу не ўваходзяць, з гэтага часу можна будзе толькі па рэцэпту доктара.

БелТА/аз