Каваленку кормяць бульбяным пюрэ

Фота: Народныя навіны Віцебска

Жонцы палітвязьня Сяргея Каваленкі Алене сёньня а другой гадзіне дазволілі спатканьне з мужам, якога працягваюць прымусова выводзіць з галадоўкі ў турэмным шпіталі калёніі „Віцьба-3”.

Сяргея прымусова кормяць праз зонд. Раней давалі дзіцячую малочную сумесь. А цяпер, як паведамілі Алене, яго пачалі карміць разьведзеным бульбяным пюрэ й адварамі.

Алена патрабуе, каб Сяргея перавялі ў цывільны шпіталь, бо ў такім выпадку Сяргей сам выходзіў бы з галадоўкі, якая доўжылася больш за два месяцы.

Пасьля галадоўкі Сяргей пры росьце 182 см важыць каля 45 кіляграм, ціск — 90 на 60.

Сябра КХП-БНФ Сяргей Каваленка быў асуджаны на 2 гады й месяц за парушэньне ўмоваў адбываньня „хатняй хіміі”, якую ён атрымаў за вывешваньне бел-чырвона-белага сьцяга на навагодняй ёлцы ў Віцебску. Пратэстуючы супроць перасьледу, вязень абвясьціў галадоўку, якую зь перапынкам у 20 дзён трымае зь сярэдзіны сьнежня.

svaboda.org/аз