Канавалаў адмовіўся прасіць памілаваньня

25-гадовы Дзьмітры Канавалаў, прыгавораны да вышэйшай меры пакараньня за арганізацыю выбуху ў менскім мэтро 11 красавіка 2011 году, прызнаў прыгавор у дачыненьні да сябе законным.

Генэральны пракурор Беларусі Аляксандр Канюк сказаў, што пра гэта Канавалаў заявіў яшчэ 19 сьнежня чальцам спэцыяльна створанай камісіі. Як сьцьвярджае генпракурор, пра магчымасьць напісаньня прашэньня аб памілаваньні Канавалаву нагадвалі двойчы, і двойчы ён адмовіўся скарыстацца гэтым правам.

Другі асуджаны па гэтай справе за саўдзел у тэрарызьме Ўладзіслаў Кавалёў, таксама прыгавораны да сьмяротнай кары, прашэньне аб памілаваньні падаў 7 сьнежня.

Заключэньне Генпракуратуры па яго прашэньні ўжо падрыхтавана, бліжэйшым часам дакумэнты будуць перададзены ў камісію па памілаваньні пры прэзыдэнце.

Дата паседжаньня камісіі па справе Канавалава й Кавалёва пакуль невядомая.

кр/ БелаПАН