Лукашэнка падпісаў папраўкі

Аляксандар Лукашэнка падпісаў папраўкі ў закон аб масавых мерапрыемствах і шэраг законаў, якія рэгулююць грамадзка-палітычную дзейнасьць у краіне. Новы закон аб масавых мерапрыемствах робіць больш жорсткімі правілы іх правядзеньня. Так, арганізацыя любога збору грамадзян павінна быць санкцыянаваная ўладамі — гэта тычыцца й флэшмобаў, і збору грамадзян, арганізаванага з выкарыстаньнем інтэрнэту. Акрамя таго, папраўкі ў заканадаўства робяць крымінальна каральным замежнае фінансаваньне недзяржаўных арганізацый.
Дакумэнт забараняе грамадзкім аб’яднаньням захоўваць грашовыя сродкі, каштоўныя мэталы й іншыя каштоўнасьці ў банках і крэдытна-фінансавых арганізацыях, якія знаходзяцца на тэрыторыі замежных дзяржаў.
Папраўкі востра скрытыкавалі беларуская апазыцыя ды недзяржаўныя арганізацыі. Ня ўводзіць у дзеяньне новыя законы Менск таксама заклікалі прадстаўнікі міжнароднай грамадзкасьці, у тым ліку Эўразьвяз і АБСЭ.

паводле БелаПАН/вс