На актывіста, які выступае супраць акумулятарнага заводу, сшылі крымінальную справу

На берасьцейскага актывіста, які выступае супраць акумулятарнага заводу, распачалі крымінальную справу

Актывіста Майсея Мазько, які ўдзельнічаў у пратэсьце супраць будаўніцтва акумулятарнага заводу пад Берасьцем, затрымалі па падазрэньні ў незаконным захоўваньні патронаў і выбухоўкі. Пра гэта belsat.eu паведаміў праваабаронца Раман Кісьляк. 62-гадовы Мазько цяпер зьмешчаны ў ізалятар. Яму пагражае да 7 гадоў пазбаўленьня волі.

Як распавёў Кісьляк, сілавікі затрымалі актывіста ўчора ўвечары, ноччу з яго ўзялі тлумачэньні і адправілі ў ізалятар. Раніцай 3 красавіка ў доме Мазько ў вёсцы Тэльмы правялі вобшук. Працэсуальны статус Мазько на гэты момант – падазраваны, абвінавачваньне пакуль не выстаўлена. Афіцыйных камэнтароў праваахоўных органаў пакуль не было.

Маісей Мазько, сябар ініцыятыўнай групы супраць будаўніцтва заводу АКБ, 2 красавіка быў спынены ДАІ, пасьля чаго ў ягонай машыне супрацоўнікі міліцыі знайшлі чорны пакет, а ў ім прадметы, падобныя да патронаў. Пазьней там жа міліцыянты знайшлі выбухоўку і ўзрывацель.

«Відавочна, гэта ўсё было падкінутае ў машыну Мазько міліцыянтамі. Яны нешта доўга шукалі, праглядалі рамяні бясьпекі, хаця звычайна ДАІ ніколі такога не робіць. Вельмі непраўдападобна! Яны нават не маглі дакладна патлумачыць, навошта праводзіць пільны агляд аўта – казалі толькі, што ў Высокім нібыта раней зьнікла падобная машына», – кажа Раман Кісьляк.

Ён сьцьвярджае, што супраць Мазько была здзейсненая правакацыя праз удзел у пратэсьце.

Такога ж меркаваньня прытрымліваюцца й сваякі Мазько.

belsat.eu/яс