Анархіст Паліенка абвясьціў галадоўку

Ад 24 сакавіка зьняволены анархіст Зьміцер Паліенка трымае галадоўку ў ізалятары часовага ўтрыманьня, паведаміў яго знаёмы Вячаслаў Касінераў на Facebook.

Паліенка патрабуе мэдычнай дапамогі: у яго абвастрыўся дэрматыт, а доктар прыходзіў толькі раз — ніякая дапамога не аказваецца. Таксама ён патрабуе аддаць яму забраную асадку, каб пісаць лісты сябрам і скаргі на ўмовы ўтрыманьня, і хоча бачыць лісты, якія шлюць яму (пакуль атрымаў толькі адзін).

Зьмітра Паліенку затрымалі раніцай 20 сакавіка — нібыта за тое, што ён распыліў пярцовы газ на чалавека за тыдзень да таго (сябры Паліенкі кажуць, што мужчына нападаў на яго). Сёлета Паліенку ўжо штрафавалі за «экстрэмісцкую шапку», затрымлівалі ў справе аб антыміліцэйскім графіці.

За кратамі Зьміцер прабыў больш за паўтара года.

Зьмітра асудзілі за «гвалт або пагрозу ўжываньня гвалту ў дачыненьні да супрацоўніка органаў унутраных справаў» і «выраб і распаўсюд парнаграфічных матэрыялаў або прадметаў парнаграфічнага характару».

Міжнародная праваабарончая арганізацыя Amnesty International прызнала яго вязьнем сумленьня. Віны ён не прызнаў. Беларускія праваабаронцы патрабавалі вызваліць актывіста. Прысуд яму называлі палітычна матываваным.

svaboda.org/яс