Закупленыя для перапісу насельніцтва пляншэты аддадуць у Мінадукацыі

Для перапісу насельніцтва Беларусі, які пройдзе восеньню гэтага году, закупяць 6800 пляншэтных камп'ютараў. Пасьля правядзеньня працэдуры большую частку гаджэтаў перададуць у Міністэрства адукацыі.

Усяго будзе закуплена 6800 пляншэтаў, якія задзейнічаюць для правядзеньня перапісу насельніцтва Беларусі ў кастрычніку 2019 году. Кіраўнік Галоўнага інфармацыйна-аналітычнага цэнтру Мінадукацыі Павел Ліс паведаміў TUT.by, што пасьля перапісу 5100 пляншэтаў перададуць у Міністэрства адукацыі.

Плянуецца, што гэтыя прылады будуць выкарыстоўваць выкладчыкі IT-спэцыяльнасьцяў у каледжах. Пляншэты, якія застануцца, аддадуць Міністэрству аховы здароўя для «інфарматызацыі ўстаноў аховы здароўя».

З пытаньнямі, якія будуць задаваць перапісчыкі людзям, можна азнаёміцца на сайце Белстата, дзе зьявіліся перапісныя лісты.

тэлеграф/вс