Рассельгаснагляд зьняў санкцыі з шасьці беларускіх кампаній

Рассельгаснагляд з 16 сакавіка адмяняе часовыя абмежаваньні на пастаўкі ў Расею прадукцыі шэрагу беларускіх прадпрыемстваў. Пра гэта паведамляецца на сайце расейскага ведамства.

Гаворка ідзе пра наступных беларускіх вытворцаў:

- ТАА «Праймілк» (сухая малочная прадукцыя);

- Філіял «Асіповіцкі» ААТ «Бабушкина крынка» – кіруючая кампанія холдынгу «Магілёўская малочная кампанія «Бабушкина крынка» (сухая малочная прадукцыя);

- ПУП «Мсціслаўмалако» (сыры);

- Філіял «Быхаўскі» ААТ «Бабушкина крынка» – кіруючая кампанія холдынгу »Магілёўская малочная кампанія «Бабушкина крынка» (сухая малочная прадукцыя);

- ААТ «Малочная кампанія Навагрудскія дары» (сыры, масла);

- ААТ «Ашмянскі мясакамбінат» (за выключэньнем прадукцыі, забароненай да ўвозу з прычыны абмежаваньняў па АЧС).

Пры гэтым пастаўкі з апошніх чатырох прадпрыемстваў застаюцца пад рэжымам узмоцненага лябараторнага кантролю. Спэцыялісты Рассельгаснагляду будуць браць ня менш за 10 пробаў па раней выяўленых паказчыках.

Прадукцыя, прызначаная для паставак у Расею, павінна быць выпрацаваная з 16 сакавіка 2019 года і мець электронны вэтэрынарны сэртыфікат.

эўрарадыё/вс