Амэрыканец хоча прабегчы праз палову Беларусі

Джарэд Голдман, які вырас у амэрыканскім Сэнт-Луісе, а апошнія 18 гадоў пражываў у Бэрліне, зьбіраецца гэтым летам прыехаць у Беларусь, каб прабегчы 230 кілямэтраў зь Менску да Кажан-Гарадка ў Лунінецкім раёне. З гэтага палескага мястэчка на пачатку ХХ стагодзьдзя эміграваў у ЗША ягоны дзед Гэцке.

Усе нашчадкі Голдманаў жылі ў Сэнт-Луісе. Больш за сто гадоў ніхто зь іх ня быў у Беларусі. У Джэрада нарадзілася ідэя прабегчы празь Беларусь.

Цяпер ён распрацоўвае плян. Агулам хацеў бы прабегчы 230 кілямэтраў зь Менску да Кажан-Гарадка за два тыдні. Думае прабягаць па 25-30 кілямэтраў за дзень.

«Я хачу больш даведацца пра месца, адкуль я паходжу, – кажа Джарэд. – Таксама спадзяюся, што мне давядзецца пераадольваць пэўныя фізычныя выпрабаваньні. Так я больш даведаюся пра сябе і пра свае здольнасьці».

Паводле Радыё «Свабода»/юл