Севярынца аштрафавалі і канфіскавалі рэчы

Удзельнікаў пікета ля рэстарана «Поедем, поедим» Паўла Севярынца і Сяргея Анянкова аштрафавалі на вялікія сумы. Севярынец мусіць заплаціць дзяржаве 1200 рублёў (49 базавых велічынь), а Анянкоў — 931 (38 базавых).

Актывістаў прызналі вінаватымі ў непадпарадкаваньні міліцыі (артыкул 23.4 адміністрацыйнага кодэкса). Яны ж кажуць, што непадпарадкаваньня не было.

Паўла Севярынца і Сяргея Анянкова затрымалі 12 сьнежня каля рэстарана «Поедем поедим» побач з Курапатамі. Увечары іх завезьлі ў Бараўлянскі райаддзел міліцыі і склалі пратакол за непадпарадкаваньне міліцыі. Прычым, міліцыянэраў выклікаў наведвальнік рэстарацыі, які ў ёй часта бывае. Ён адмовіўся ўзяць буклеты пра Курапаты і пакінуць аўтамабіль на ўезьдзе, пачаў скандаліць. Такую вэрсію падзей выклалі Севярынец і Анянкоў.

14 сьнежня Павел Севярынец паведаміў у фэйсбуку, што ў яго канфіскавалі тэлефон Nokia 73 і гадзіньнік «Луч», якія застануцца у ізалятары часовага ўтрыманьня, адкуль палітыка выпусьцілі, да выплаты штрафу. Паводле слоў Севярынца, гэткае здарылася зь ім упершыню. Рэчы Севярынца будуць знаходзіцца ў бараўлянскай міліцыі.

Svaboda.org; facebook.com/вк