Урад перавядзе краіну з газу на электрычнасьць

У 2019 годзе ў Беларусі будзе адзіны тарыф на электрычную энэргію для насельніцтва. Віцэ-прэм'ер Уладзімер Кухараў заявіў, што ад цяпер будаўнічы комплекс будзе накіраваны на максымальнае выкарыстаньне электрычнай энэргіі ў жылых дамах.

«Пасьля будаўніцтва БелАЭС у нас будзе дастатковая колькасьць айчыннай электраэнэргіі. Мы бачым, што зможам даць для насельніцтва танную электраэнэргію ў любых абʼёмах», – патлумачаў чыноўнік.

Мяркуецца, што даступны кошт электраэнэргіі стане галоўным стымулам для яе максымальнага выкарыстаньня.

«Працуем зь Міністэрствам энэргетыкі па тарыфах на электраэнэргію, якія складуць канкурэнцыю тарыфам на ацяпленьне. У бліжэйшы час прыйдзем да тарыфаў, якія будуць зьніжаны для дамоў зь электрычным ацяпленьнем. Акрамя таго, будаўніцтва такіх дамоў дасьць магчымасьць значна зьнізіць абʼём сродкаў, неабходных для будаўніцтва інфраструктуры», – паведаміў беларускі віцэ-прэмʼер Уладзімер Кухараў.

nn.by/эж