Памёр пісьменьнік і журналіст Уладзіслаў Ахроменка

9 лістапада 2018 году ня стала таленавітага беларускага пісьменьніка, драматурга, кінасцэнарыста Ўладзіслава Ахроменкі. 29 кастрычніка ў Беластоку ў яго здарыўся цяжкі інфаркт. Ахроменку знайшлі непрытомным у гатэльным нумары, дзе ён спыніўся.

Уладзіслаў Ахроменка нарадзіўся 29 студзеня 1965 года ў Гомелі. Закончыў Беларускую дзяржаўную кансэрваторыю. Працаваў выкладчыкам музычнай школы, у часопісе «Крыніца» й «Бярозка», у газэце «Культура».

Жыў у Чарнігаве й Менску. Як пісьменьнік працаваў у вострасюжэтных, запатрабаваных жанрах – дэтэктыў, трылер, альтэрнатыўная гісторыя. Пад псэўданімамі выдаў каля дзьвюх соцень камэрцыйных раманаў на расейскай мове, некаторыя зь іх экранізаваныя.

Ва Ўладзіслава Ахроменкі засталіся жонка й трое дзяцей.

паводле радыё рацыя/вс