У Менску плянуецца стварыць адзіны камбінат школьнага харчаваньня

Адзіны камбінат школьнага харчаваньня плянуецца стварыць у Менску да 1 лістапада. Гарадзкія ўлады заяўляюць пра магчымае зьніжэньне цэнаў і спрашчэньне працэсу.

Як паведаміў на пасяджэньні ў гарадзкім выканаўчым камітэце начальнік Галоўнага ўпраўленьня спажывецкага рынку Менгарвыканкаму Андрэй Улезла, у кожным раёне будзе створаны вытворчы ўчастак без права юрыдычнай асобы.

«Гэтая мера дасьць магчымасьць забясьпечыць цэнтралізаванае набываньне прадукцыі па адзіных, больш нізкіх коштах з улікам закупачных аб'ёмаў і пазьбегнуць неабгрунтаванага пасярэдніцтва. Акрамя таго, гэта дапаможа ўдасканаліць лягістыку дастаўкі тавараў і сыравіны за кошт укараненьня кальцавога завозу тавараў і скарачэньня транспартных выдаткаў », – сказаў А. Улезла.

Дзякуючы працы адзінага КШХ будзе магчыма фармаваць аднолькавыя кошты на школьныя абеды па ўсім Менску.

Паводле www.bdg.by/нг