У Беларусі прапануюць увесьці новы від страхаваньня ў турызьме

У Беларусі прапануецца ўвесьці новы від страхаваньня ў турызьме - страхаваньне грамадзянскай адказнасьці турыстычнай арганізацыі. Прадстаўнікі галіны на фоне падзей гэтага сэзона (у тым ліку фінансавых праблем расейскіх турапэратараў, складанасьці з палётнымі праграмамі ўкраінскіх турапэратараў) ініцыююць зьмяненьні ў страхаваньні ў турбізнэсе.

Як адзначыў старшыня Рэспубліканскага саюза туріндустрыі Беларусі Піліп Гулы, практыка такога страхаваньня турыстычнай дзейнасьці існуе ў Расеі, Казахстане, іншых краінах. Пытаньне ў тым, ці падыходзіць Беларусі ў чыстым выглядзе расейская або польская мадэль ці патрэбны нейкі камбінаваны варыянт.

Начальнік упраўленьня мэдыцынскага страхаваньня „Белдзяржстраха” Людміла Кулак удакладніла, што страхаваньне грамадзянскай адказнасьці турарганізацыі магло б стаць мэханізмам абароны правоў турыстаў у тых выпадках, калі турфірмамі не выконваюцца абавязацельствы.

Пакуль нарматыўнага прававога акта, які ўстанаўліваў бы абавязковасьць або існаваньне такога віду страхаваньня, у Беларусі няма. Турыст можа купіць мэдыцынскую страхоўку або страхоўку ад нявыезду. Апошні страхавы поліс гарантуе вяртаньне грошай у выпадку аб'ектыўных асабістых праблем у турыста - адмова ў візе, экстранная шпіталізацыя непасрэдна перад паездкай, сьмерць блізкіх сваякоў, прызыў на ваенныя зборы або ваенную службу. Ёсьць яшчэ адзін від страхаваньня, які дае магчымасьць пазьбегнуць дадатковых расходаў - страхаваньне агульнаграмадзянскай адказнасьці турыста, які знаходзіцца за мяжой.

„Іншых відаў страхаваньня, якія пакрывалі б у тым ліку нейкія расходы, зьвязаныя з невыкананьнем абавязацельстваў турыстычнай арганізацыяй, сёньня ў Беларусі няма. „Белдзяржстрах”, калі будзе ініцыятыва Мінспорту або нашага непасрэднага рэгулятара Міністэрства фінансаў, гатовы працаваць у гэтым напрамку”, - рэзюмавала Людміла Кулак.

belta.by/аз