Улады склалі сьпісы льготнікаў па аплаце камуналкі

Міністэрства працы і сацыяльнай абароны вызначыла прыкладны пералік сытуацый, пры якіх беспрацоўных, якія падпадаюць пад дзеяньне дэкрэта №1, могуць поўнасьцю або часткова вызваліць ад аплаты камунальных паслуг па 100% тарыфе.

Ідзецца пра чатыры сытуацыі. Першая – па стане здароўя. Напрыклад, наяўнасьць у чалавека захворваньня, якое зьяўляецца паказаньнем да ўстанаўленьня інваліднасьці, але яна з нейкіх прычын пакуль што не аформлена, працяглае аднаўленьне пасьля траўмы, праходжаньне курса лячэньня і рэабілітацыі ад нарказалежнасьці.

Другая – неабходнасьць догляду дзяцей, старэйшых за сем гадоў. Напрыклад, школьнік стаіць на дыспансэрным уліку з хранічным захворваньнем, навучаецца дома пасьля хваробы.

Трэцяя сытуацыя – неабходнасьць пастаяннага ці часовага догляду за дарослымі непрацаздольнымі грамадзянамі. Чацьвёртая – адсутнасьць магчымасьці працаўладкаваньня. Тут могуць быць такія абʼектыўныя прычыны, як значная аддаленасьць месца жыхарства ад органаў тэрытарыяльнай службы занятасьці, нерэгулярная транспартная сувязь, адсутнасьць вакансій па спэцыяльнасьці.

Паводле Наша Ніва\юл