Трэці суд над ЛГБТ-актывісткай Вікай Біран не адбудзецца

Cуд Ленінскага раёна Менска спыніў адміністрацыйную справу на ЛГБТ-актывістку Віку Біран за фота з плякатам «Самі вы падробка» каля будынку КДБ. Як паведамляе праваабарончы сайт «Вясна», гэта тлумачыцца завяршэньнем тэрміну для прыцягненьня да адміністрацыйнай адказнасьці.

Разгляд справы ў судзе адбыўся 30 ліпеня. Судзьдзя Марына Грамовіч устанавіла, што пратакол за «несанкцыянаваны пікет» на Віку Біран быў складзены 4 чэрвеня, у суд справа трапіла 27 ліпеня, а само правапарушэньне адбылося 24 траўня. Тэрмін прыцягненьня да адміністрацыйнай адказнасьці скончыўся яшчэ 22 ліпеня. Таму справу проста спынілі.

Нагадаем, што пасьля гамафобных заяваў МУС і кіраўніка ведамства Ігара Шуневіча дзяўчына сфатаграфавалася каля МУС, КДБ і Дома ўрада. Яна трымала ў руках плякат «Самі вы падробка». За гэта яе двойчы судзілі ў раённых судах Менска, прызнаўшы вінаватай у правядзеньні несанкцыяванага мерапрыемства. Агулам яе аштрафавалі на 735 рублёў (два штрафы па 15 базавых велічыняў). На краўдфандынгавай плятформе «Талака» ёй у дапамогу сабралі больш за 900 рублёў.

эўрарадыё/вс