Аршанскія актывісты шукаюць грошы, каб выкупіць дом Караткевіча

Аршанскае моладзевае грамадзкае аб'яднаньне «Зьвяз» гатова выкупіць дом Караткевіча для стварэньня там культурнай прасторы.

Папярэднія перамовы з уладальніцай дома ўжо прайшлі. Калі менавіта «Зьвяз» выкупіць дом, у якім некаторы час жыў знакаміты пісьменьнік, то сам дом захаваецца і стане публічнай пляцоўкай для правядзеньня грамадзкіх і культурных мерапрыемстваў.

На перашкодзе стаяць фінансавыя пытаньні. Як не камэрцыйная арганізацыя «Зьвяз» ня мае сродкаў, каб адразу выплаціць усю суму і таму, літаральна на днях, плянуе запусьціць дабрачынны збор сродкаў праз краўндфандынгавую плятформу «Талака».

У выпадку, калі сродкі ня будуць сабраныя да верасьня (у гэты час уладальніца дома хоча аформіць усе дакумэнты), то сябры арганізацыі гатовы ўзяць над домам шэфства – даглядаць за ім да таго часу, пакуль ня змогуць выкупіць цалкам.

orsha.eu/ав