У Менску праходзіць пасяджэньне кантактнай групы па Ўкраіне

У Менску праходзіць пасяджэньне трохбаковай кантактнай групы па ўрэгуляваньні сытуацыі на паўднёвым усходзе Ўкраіны.

Сустрэчы папярэднічалі перамовы падгруп кантактнай групы: па эканамічных, палітычных, гуманітарных пытаньнях, а таксама па пытаньнях бясьпекі. Перамовы ў «Прэзыдэнт-гатэлі» традыцыйна праходзяць у закрытым для прэсы рэжыме.

Папярэдні раўнд перамоў прайшоў 13 чэрвеня.

Па выніках сустрэчы спэцпрадстаўнік дзеючага старшыні АБСЭ ў трохбаковай кантактнай групе Марцін Сайдзік паведаміў журналістам, што з пачатку 2018 году колькасьць ахвяраў канфлікту крыху зьменшылася ў параўнаньні з аналягічным леташнім пэрыядам. Аднак за гэты час зноў гінулі дзеці, і колькасьць ахвяр сярод іх вырасла. «Гэты факт мяне вельмі абурае, – заявіў Сайдзік. – Нават адна чалавечая ахвяра – гэта занадта шмат».

Паводле яго слоў, эканамічная падгрупа працягвае абмеркаваньне далейшых крокаў па аднаўленьні й паляпшэньню мабільнай сувязі ў асобных раёнах Данецкай і Луганскай абласьцей.

naviny.by/вс