Пэнсіянэрку зьняволілі за знойдзеныя ёю патроны

Бабруйскую пэнсіянэрку Надзею Лукашэвіч трымаюць у сьледчым ізалятары за захоўваньне патронаў. 66-гадовую жанчыну абвінавачваюць у захоўваньні зброі. У яе сумачцы знайшлі каробку з 45 спартова-паляўнічымі патронамі. Ёй пагражае пазбаўленьне волі на тэрмін да 7 гадоў з канфіскацыяй або без канфіскацыі маёмасьці. Экспэртыза прызнала патроны прыдатнымі для стральбы.

Жанчына кажа, што знайшла каробачку з патронамі ў лесе па дарозе на дачу і паклала ў торбу. На наступны дзень яна выклікала міліцыю ў сувязі з падазрэньнем у крадзяжы пэнсіі. Тады, падчас вобшуку, міліцыянэры на кватэры знайшлі торбачку з патронамі.

7 чэрвеня да Надзеі Лукашэвіч прыйшла міліцыя, каб затрымаць жанчыну. Яна не адчыніла дзьверы і міліцыя з дапамогай пажарнай машыны спрабавала залезьці ў кватэру праз акно.

У Сьледчым камітэце пэнсіянэрку пратрымалі некалькі гадзін, у яе падняўся ціск, выклікалі «хуткую». Цяпер Лукашэвіч знаходзіцца ў ізалятары, дзе чакае суду.

Надзея Лукашэвіч — член грамадзкай ініцыятывы «Супраць беззаконьня ў судах і пракуратуры». Яна выходзіла на пікеты, разьбіралася з прадпрыемствам «Белшына» ў сувязі з сур’ёзнай траўмай мужа, якую не прызнавалі вытворчай.

Svaboda.org/вк