Статкевіч заклікае далучыцца да афіцыйнага сьвяткаваньня Першамая

Напярэдадні Дня Працы апазыцыйны дзеяч Мікалай Статкевіч заклікаў выкарыстаць афіцыйнае сьвяткаваньне для выказваньня пратэсту.

У сваім акаўнце на «Фэйсбуку» ён апублікаваў зварот Рады Беларускага нацыянальнага кангрэсу (БНК) пад назвай «Змусім уладу слухаць народ».

У звароце гаворыцца, што ўлады зноў спрабуюць кампэнсаваць правалы сваёй эканамічнай палітыкі за кошт народа.

«Сацыяльная дзяржава» ператворана ў фікцыю (...). Сотні тысяч людзей, каб пракарміць сем'і, мусяць шукаць заробкаў на чужыне. Павышаецца плата за жыльлёва-камунальныя паслугі, асабліва ў інтэрнатах (...)», – пералічваецца ў звароце.

Статкевіч нагадвае, што Першамай ад пачатку быў днём барацьбы працоўных людзей за свае правы. Таму БНК заклікае грамадзян скарыстацца дазволенымі мерапрыемствамі, якія будуць ладзіць афіцыйныя прафсаюзы зь мясцовымі ўладамі.

эўрарадыё/вс