У Азэрбайджане могуць зьявіцца беларускія электробусы й ліфты

Беларусь і Азэрбайджан прапрацуюць стварэньне зборачнай вытворчасьці ліфтаў і пастаўку беларускіх электробусаў. Пра гэта паведамілі ў беларускім урадзе па выніках візыту віцэ-прэм'ера Ўладзіміра Сямашкі ў Азэрбайджан.

Беларуская дэлегацыя на сустрэчах з прэмʼер-міністрам і прэзыдэнтам Азэрбайджана абмеркавала пытаньні ў галіне прамысловасьці, сельскай гаспадаркі, фармацэўтыкі, транспарту, пашырэньня ўзаемных паставак харчаваньня, дасягнула дамоўленасьці аб прапрацоўцы новых пэрспэктыўных праектаў двухбаковага супрацоўніцтва.

Абмеркаваныя пытаньні росту зборкі аўтатэхнікі МАЗ на базе Гянджынскага аўтамабільнага заводу, у тым ліку стварэньня зборачнай вытворчасьці пасажырскіх аўтобусаў. Адзначана пэрспэктыўнасьць паставак тэхнікі «Гомсельмашу» для аграрных прадпрыемстваў Азэрбайджана з наступнай прапрацоўкай арганізацыі зборачнай вытворчасьці сельгастэхнікі ў Гянджы або Сумгаіце.

Дасягнутыя дамоўленасьці аб прапрацоўцы праектаў па стварэньні зборачнай вытворчасьці беларускіх ліфтаў, дызэль-генэратараў, а таксама паставак электробусаў у Азэрбайджан.

тэлеграф/вс