У Беларусі зьявіцца шэраг прадпрыемстваў, дзе будуць працаваць былыя зьняволеныя

Кіраўнік МУС Ігар Шуневіч разам з начальнікам Дэпартамэнта выкананьня пакараньняў МУС Алегам Маткіна ўпершыню наведаў сельскагаспадарчае прадпрыемства «Хутар-Агра» (Гомельшчыны, Светлагорскі раён), дзе працуюць былыя зьняволеныя.

Нагадаем, яшчэ ў жніўні 2017 года Ігар Шуневіч заявіў, што ў структуры крымінальна-выканаўчай сыстэмы МУС плянуецца стварыць спэцыялізаванае сельгаспрадпрыемства для працаўладкаваньня былых вязьняў. Ініцыятыва міністра была неадназначна ўспрынятая ў грамадзтве. Прадпрыемства пачало працаваць у студзені 2018 года.

« Сёньня тут працаўладкаваныя каля 30 чалавек, якія знаходзяцца ў лячэбна-працоўным прафілакторыі або вызваліліся. Гэта, безумоўна, невялікая колькасьць, але мы будзем яе павялічваць», – заявіў міністар. Шуневіч анансаваў будаўніцтва новых аб’ектаў і ўзбуйненьне вытворчасьці. :

У МУС падкрэсьліваюць, што праца на такіх аб'ектах будзе выключна добраахвотнай.

«Мы будзем працаўладкоўваць тут тых, хто сам захоча працаваць», – адзначыў міністар.

Шуневіч паабяцаў у будучыні стварыць на прадпрыемстве «ідэальныя ўмовы для працы і жыцьця»

У МУС адзначаюць, што такая практыка, як стварэньне прадпрыемства кшталту «Хутар-агра», будзе пашырацца. Не выключана таксама, што гэтую ініцыятыву падтрымаюць і іншыя сілавыя ведамствы.

belsat.eu/яс