Грошы на мэмарыяльную дошку да 100-годзьдзя БНР сабралі за тры гадзіны

1 сакавіка менскія ўлады далі дазвол на ўстаноўку мэмарыяльнай дошкі на вуліцы Валадарскага, 9, дзе была абвешчана Беларуская Народная Рэспубліка. 2 сакавіка на краўдфандынг-пляцоўцы «Талака» неабходныя для вырабу новай дошкі 6000 рублёў сабралі трохі болей за 3 гадзіны.

Пасьля таго, як стала вядома пра дазвол на ўстаноўку мэмарыяльнай дошкі на вуліцы Валадарскага, 9, паўсталі дзьве праблемы.

Па-першае, прататып дошкі аўтарства скульптара Алеся Шатэрніка выраблены 25 гадоў таму зь сілуміну — сплаву алюмінію і крэмнію — і знаходзіцца ня ў самым лепшым стане. Літары маюць розны памер, вершнік складаецца з трох частак і літаральна развальваецца.

Па-другое, улады не пагаджаюцца на надпіс на дошцы тарашкевіцай, тэкст мусіць адпавядаць сучаснаму правапісу.

Аргкамітэт сьвяткаваньня 100-годзьдзя БНР прыняў рашэньне тэрмінова вырабіць копію дошкі з бронзы. Адказным за збор сродкаў на краўдфандынгавай онлайн-пляцоўцы «Талака» стаў грамадзкі актывіст Глеб Лабадзенка. Патрэбную суму — 6000 рублёў — удалося сабраць за трохі болей як 3 гадзіны.

svaboda.org/яс