У Горадні зьбіраюцца майстры з Польшчы ды Беларусі

Імпрэза зьбярэ майстроў і рамесьнікаў зь Беларусі й Польшчы.

4 сакавіка Горадня ператворыцца ў горад майстроў. На цэнтральнай плошчы горада – Савецкай – пачнецца вядомы яшчэ з часоў сярэднявечча кірмаш «Казюкі». Тады кірмаш ладзіўся штогод у памяць аб сьвятым Казіміру – заступніку моладзі, майстроў і рамесьнікаў. Сёлета цырымонія адкрыцьця пройдзе на трох мовах – беларускай, летувіскай, польскай.

Галоўная асаблівасьць імпрэзы – вырабы ручной работы. Сябе пакажуць звыш 200 майстроў з многіх рэгіёнаў Беларусі, таксама чакаюць гасьцей з Польшчы. Тут можна будзе набыць вырабы з гліны, скуры, дрэва, мэталю, саломкі.

Рамесьнікі правядуць майстар-клясы, прапануюць наведвальнікам самім вырабіць сувэнір на памяць. У прыватнасьці, заплянавана арганізацыя кавальскага гарадка, дзе кожны жадаючы зможа паспрабаваць сябе ў каваньні.

Стартуюць «Казюкі» ў 11 гадзін. Сьвята прадоўжыцца ўвесь дзень. Арганізатары абяцаюць, што, калі дазволіць надворʼе, рамесны гарадок разгорнецца яшчэ 3 сакавіка.

На гарадзенскім кірмашы будуць ня толькі гандляваць. У праграме выступы фальклёрных песенных і танцавальных калектываў.

Кірмаш ладзіцца сумесна Гарадзенскім гарвыканкамам і гарадзкім аддзелам Саюза палякаў у Беларусі.

Паводле Белта/юл