Бацькі і дзеці разам адсьвяткавалі Дзень роднай мовы

Больш за 100 беларускамоўных бацькоў і дзяцей разам адсьвяткавалі Дзень роднай мовы

25 лютага ў кавярні «Грай» адбылося сямейнае сьвяткаваньне Дня роднай мовы, арганізаванае інтэрнэт-суполкай «Дзеткі-кветкі» і адукацыйным цэнтрам «Крочым разам».

Сьвята прайшло ў фармаце інтэрактыву, падчас якога ўсе дзеці ў касьцюмах лясных жыхароў апынуліся ў лясной школцы і разам з воўкам, авечкай ды іншымі жывёламі спасьцігалі розныя навукі: геаграфію, астраномію, фізычнае выхаваньне і, вядома, родную мову.

«Падобных мерапрыемстваў для беларускамоўных сем’яў мусіць быць болей, настаў час іх выводзіць на больш высокі ўзровень. Калі столькі людзей у 15-градусны мароз сабраліся тут разам, раззнаёміліся — гэта ўжо паказчык таго, што фармуецца асяродзьдзе з маленства, і ў будучыні гэта дасьць магчымасьць нашым дзеткам размаўляць паміж сабой па-беларуску», — адзначыў Зьміцер Смаляк, адзін з арганізатараў імпрэзы і актор спэктаклю «Лясная школка».

Суполка «Дзеткі-кветкі» налічвае каля 350 беларускамоўных бацькоў, якія актыўна камунікуюць у сеціве, адстойваюць правы беларускамоўных дзяцей у садках і школах, а таксама рэгулярна ладзяць супольныя сьвяты, каб дзеткі маглі стасавацца паміж сабой на роднай мове.

svaboda.org/яс