Міліцыянты зламалі яму рэбры, суд прысудзіў штраф за непадпарадкаваньне міліцыі

Судзьдзя Рагачоўскага раённага суду Аляксандар Крайнікаў прызнаў вінаватым Віктара Арцюха ў непадпарадкаваньні міліцыянтам дэпартамэнту аховы і аштрафаваў яго на 2 базавыя велічыні — 49 рублёў.

«Канечне, будзем з адвакатам абскарджваць гэтую пастанову, бо яна не адпавядае рэчаіснасьці», — кажа Віктар Арцюх.

Паводле Віктара Арцюха, яго спынілі на вуліцы міліцыянты за адсутнасьць флікера. Калі Арцюх папрасіў іх прадставіцца і не пагадзіўся адразу сесьці ў машыну, да яго ўжылі сілу. Зьбіцьцё паўтарылася і ў машыне, і на ганку пастарунка. У выніку яму зламалі рэбры.

На судзе высьветлілася, што відэа затрыманьня ў міліцыянтаў няма.

Паводле аднаго рапарту, парушэньне Арцюха было ў тым, што ён ішоў па праезнай частцы, паводле другога — што пераходзіў вуліцу ў неналежным месцы.

Раней, 7 лютага, Рагачоўскі раённы суд аштрафаваў Віктара Арцюха за адсутнасьць флікера на 1 базавую велічыню.

Віктар Арцюх паскардзіўся на дзеяньні міліцыянтаў у пракуратуру і Сьледчы камітэт.

Радыё Свабода/нг