У Бабруйску «карусель» раскрылі блёгер і актывіст

Вядомы блёгер Алег Жалноў і актывіст Алесь Сапега, які сам балатаваўся ў гарадзкі савет дэпутатаў, выкрылі схему выбарчай «каруселі» у Бабруйску. Але калі яны запатрабавалі тлумачэньняў ад старшыні камісіі – тая зьвярнулася да міліцыянтаў.

«Я балатаваўся па 38-й акрузе ў Бабруйску. Учора прыблізна а 18-й вечара я пад’ехаў да ўчастку №62, што месьціцца ў 22-й школе. Ля будынку заўважыў «Жыгулі» з надпісам «сацыяльная служба». Адтуль выйшлі чатыры асобы і зайшлі на ўчастак, каб прагаласаваць», – распавёў belsat.eu Алесь Сапега.

Актывіст вырашыў паназіраць, ці не паедуць яны пасьля галасаваньня на іншы ўчастак, і прасачыў за машынай.

«І яны сапраўды павярнулі на ўчастак №77 па вуліцы Ульянаўскай. Машына прыпаркавалася мэтраў за 400 ад участку, пасажыры пайшлі да школы групкамі па дзьве асобы. Пакуль першыя два чалавекі зайшлі на ўчастак – астатнія чакалі, пасьля наадварот. Гэта было вельмі падобна да «каруселі», – кажа Сапега.

Паводле словаў актывіста, пакуль патэнцыйныя «карусельшчыкі» галасавалі, ён разам з блёгерам Алегам Жалновым, падышлі да кіроўцы машыны. Той прызнаўся, што не ведае людзей, якіх падвозіў.

«Я забраў чатырох жанчын каля школы ў Чарапічным раёне гораду, пасьля павёз іх у 22-ю школу, цяпер сюды», – сказаў кіроўца.

Высьветлілася, што ён працуе ў адміністрацыі Першамайскага раёну Бабруйска і там яго «папрасілі» вазіць гэтых жанчын па выбарчых участках. Алег Жалноў здымаў размову з кіроўцам на відэа і апублікаваў запіс на сваім канале ў YouTube.

belsat.eu/яс