Менскія мытнікі выявілі каноплі ў плюшавых цацках

Супрацоўнікі мытні „Менск-2” падчас мытнага кантролю міжнародных адпраўленьняў зьвярнулі ўвагу на незвычайную пасылку. Яна прыйшла з Украіны на адрас жыхара Віцебска, паведамляе прэс-служба Мытнага камітэта.

У пасылцы знаходзіліся дзьве дзіцячыя плюшавыя цацкі — вожык і заяц. Да іх была прыкладзеная яркая паштоўка са сьвяточным аранжавым бантам і надпісам „Маёй каханай”.

Але мытнікі зьвярнулі ўвагу, што швы на цацках былі крывымі, а колер ніткі выразна адрозьніваўся ад колеру саміх цацак. Ускрыўшы цацкі, яны знайшлі там сем пакуначкаў з насеньнем канопляў. На кожным пакуначку была ўказаная разнавіднасьць гэтага насеньня.

Па факце кантрабанды насеньня канопляў мытня пачала адміністрацыйную справу.

Дарэчы, за студзень 2018 года мытня „Менск-2” выявіла тры выпадкі перасылкі насеньня канопляў у міжнародных паштовых адпраўленьнях. За мінулы год было выяўлена 29 такіх спробаў.

euroradio.fm/аз