З сёньняшняга дня вадзіцелі абавязаныя выкарыстоўваць зімовыя шыны

Згодна з правіламі дарожнага руху, у Беларусі з 1 сьнежня па 1 сакавіка вадзіцелі павінны ў абавязковым парадку выкарыстоўваць зімовыя шыны на аўтамабілях.

Як паведамілі ва УДАІ МУС, гэтае патрабаваньне тычыцца аўтамабіляў з тэхнічна дапушчальнай агульнай масай (ТДАМ) да 3,5 тоны ўключна, легкавых і грузапасажырскіх аўтамабіляў з ТДАМ звыш 3,5 тоны, а таксама аўтобусаў да 5 тон. Зімовыя шыны ўсталёўваюцца на ўсіх колах транспартнага сродку і павінны мець рэшткавую вышыню малюнка пратэктара ня менш за 4 мм.

За парушэньне гэтага патрабаваньня ПДР прадугледжана адказнасьць паводле ч. 3 арт. 18.12 КоАП Беларусі – штраф да адной базавай велічыні. За паўторнае парушэньне на працягу года на кіроўцу накладаецца штраф ад 2 да 5 базавых велічынь (цяпер адна базавая велічыня складае 23 рублі).

БелаПАН/яс