Беларускі бок не шукаў 10-гадовага Максіма ў польскай частцы Белавескай пушчы

Кіраўніцтва польскай часткі Белавескай пушчы ў размове з «Белсатам» заявіла, што пра выпадак з Максімам Мархалюком ім не вядома: беларускі бок не кантактаваў з імі ў гэтай справе.

Паводле Аддзелу доступу да Нацыянальнага парку «Белавеская пушча», магчымасьці, каб зьніклы хлопчык патрапіў у Польшчу, няма.

«Гэта немагчыма: за шмат сыстэмаў забесьпячэньня. Праз пушчу на ўсёй даўжыні дзяржаўнае мяжы цягнецца высокі плот, а таксама пераараная палоска зямлі, якая спраўджваецца штодня», – кажа Марэк Сьвіць, кіраўнік аддзелу.

Паводле адміністрацыі Нацыянальнага парку, перасоўвацца паміж абедзьвюма часткамі пушчы ня могуць нават жывёлы.

«Падаецца, Пушча – адна, але тым ня менш, мы кажам, напрыклад, пра польскі і беларускі статкі зуброў», – дадае Сьвіць.

Дзесяцігадовы Максім Мархалюк зьнік у суботу 16-га верасьня. Апрануты ў швэдар камуфляжнага колеру і чырвоную камізэльку хлопец паехаў у лес, які, паводле мясцовых жыхароў, ведаў вельмі добра. Міліцыянты знайшлі ровар Максіма, і гэта пакуль адзіны сьлед з пачатку пошукаў.

belsat.eu/яс