Жыхары Бараўлянаў пратэстуюць супраць высяканьня векавога лесу

Жыхары Бараўлянскага сельсавету Менскага раёну, якія пратэстуюць супраць высяканьня векавога лесу каля іхных дамоў і намераў будаваць на вызваленым месцы аб’екты сацкультбыту, накіравалі лісты ў Генпракуратуру, Менскі райвыканкам, Міністэрства адукацыі, Міністэрства працы і сацыяльнай абароны і Фэдэрацыю прафсаюзаў Беларусі.

Жыхары патрабуюць разабрацца і даць прававую ацэнку распачатаму ў адукацыйных і мэдыцынскіх установах Бараўлянаў і Ляснога збору подпісаў за тое, каб неадкладна збудаваць дзіцячы садок і сярэднюю школу ў раёне вуліца Жамчужная — на тэрыторыі, за якую якраз і змагаюцца мясцовыя жыхары.

«Гэта ініцыятыва ўладаў, якія ў загадным парадку націснулі на адукацыю і мэдустановы, каб распачаць збор подпісаў», - лічаць жыхары.

Каб зьвярнуць увагу на свае праблемы, жыхары Бараўлянаў паставілі на ўчастку лесу, заплянаваным пад зьнішчэньне, імправізаваны намётавы лягер. Аднак празь нейкі час міліцыянты згарнулі палаткі і як рэчавыя доказы несанкцыянаванай акцыі адвезьлі ў аддзяленьне.

Цяпер паўстае ініцыятыва арганізацыі мясцовага сходу для адкліканьня дэпутатаў, якія балятаваліся з населеных пунктаў Бараўлянскага сельсавету — уключна са старшынём Савету дэпутатаў Менскага раёну Сяргеем Шаблыкам. Жыхары перакананыя, што абраныя асобы ня толькі нічога ня робяць дзеля вырашэньня праблемных пытаньняў, а непасрэдна датычныя да ўвядзеньня грамадзкасьці ў зман.

svaboda.org/яс