Перамовы кантактнай групы па Ўкраіне пройдуць у Менску 23 жніўня

Чарговы раўнд перамоваў па ўрэгуляваньні ўзбройнага канфлікту на паўднёвым усходзе Ўкраіны рыхтуецца прыняць Менск. У бліжэйшую сераду ў беларускай сталіцы адбудзецца сустрэча трохбаковай кантактнай групы. Пра гэта журналістам паведаміла прадстаўніца Кіева ў палітычнай падгрупе Вольга Айвазоўская.

Паводле словаў дыпляматкі, галоўнай тэмай гэтым разам можа стаць замірэньне перад пачаткам новага навучальнага году. Акрамя таго Айвазоўская не выключае, што бакі абмяркуюць і дату новай сустрэчы кіраўнікоў «нармандзкай чацьвёркі», у якую ўваходзяць Украіна, Расея, Нямеччына ды Францыя. Як паведамляюць мэдыі ў Кіеве, днямі ў Менску адбыліся кансультацыі палітычных дарадчыкаў лідэраў чацьвёркі. Дэталі сустрэчы трымаюцца ў сакрэце.

Узброенае супрацьстаяньне ў Данецкай і Луганскай абласьцях Украіны трывае больш за тры гады. Па дадзеных АБСЭ на пачатак жніўня, толькі ў гэтым годзе ў зоне канфлікту загінулі ці былі параненыя амаль 350 мірных жыхароў.

racyja.com/св