Жыхары Бараўлянаў пратэстуюць супраць высечкі лесу

Жыхары пасёлку Бараўляны пад Менскам пратэстуюць супраць высяканьня лесу й пабудовы шырокай шашы побач зь іх дамамі – паведамляе тэлеканал «Белсат». У лесе, якому пагражае зьнішчэньне, яны паставілі чатыры намёты. Жыхары Бараўлянаў падазраюць мясцовыя ўлады ў карупцыйных сувязях з прыватнымі будаўнічымі кампаніямі.

Пратэст пакуль сымбалічны, але ён можа значна пашырыцца – папярэджваюць удзельнікі. Лес, які быў зацьверджаны на генэральным пляне паселішча, мясцовая адміністрацыя зьбіраецца зьнішчыць, а пасярэдзіне пабудаваць школу й дзіцячы садок. Чаму ўлады ня хочуць пабудаваць школу на полі, яны не тлумачаць.

Жыхары Бараўлянаў падазраюць мясцовую адміністрацыю ў карупцыйнай сувязі з будаўнічымі кампаніямі. На іх думку, у лесе плянуюць пабудаваць шматпавярховікі. А школа й дзіцячы садок будуюцца, каб падвесьці да іх за бюджэтныя сродкі камунальныя сеткі, да якіх пазьней падключаць камэрцыйныя дамы.

Пад дрэвамі, прызначанымі на сьпілоўваньне, ужо працуюць геадэзісты.

Belsat.eu/ап