Знакамітую беларускую мэцэнатку Магдалену Радзівіл пахаваюць у Менску

Падчас VII Зьезду беларусаў сьвету беларуская супольнасьць Швэйцарыі перадала парафіі сьвятых Сымона й Алены ў Менску прах княгіні Магдалены Радзівіл. Пра перапахаваньне знакамітай беларускай мэцэнаткі паведамляе «Радыё Свабода».

Прах са Швэйцарыі прывёз Аляксандар Сапега – намесьнік старшыні Асацыяцыі беларусаў Швэйцарыі. Пакуль ня вызначана месца, дзе будзе пахаваны прах Магдалены Радзівіл, ён будзе знаходзіцца ў Чырвоным касьцёле.

Магдалена Радзівіл, якая фінансавала выдавецтва «Загляне сонца і ў наша аконца», падтрымлівала газэту «Наша Ніва», фінансавала выданьне вершаў Максіма багдановіча «Вянок», адкрывала беларускія школы, памерла ў 1945 годзе ў швэйцарскім горадзе Фрыбург.

Летась князь Мацей Радзівіл у Менску паведаміў, што праўнукі вядомай беларускай мэцэнаткі пастанавілі перапахаваць яе цела ў Менску – у касьцёле сьвятых Сымона і Алены, побач зь якім яна жыла.

svaboda.org/ап