«Гавары праўду» заклікала ўлады адмовіцца ад удзелу ў канфліктах за мяжой

Кампанія «Гавары праўду» заклікала Аляксандра Лукашэнку, а таксама ўрад і парлямэнт Беларусі «адмовіцца ад любога фармату ўдзелу краіны ў ваенным канфлікце ў Сырыі, а таксама ў іншых канфліктах, захоўваць нэйтралітэт, спрыяючы мірнаму, дыпляматычнаму рашэньню канфліктаў». Пра гэта гаворыцца ў заяве арганізацыі, зарэгістраванай у якасьці рэспубліканскага дасьледча-асьветніцкага грамадзкага аб'яднаньня.

«Гавары праўду» выступае супраць таго, каб «беларускія вайскоўцы ў любым статусе ўдзельнічалі ў ваенных апэрацыях за межамі Рэспублікі Беларусь». «Гэта супярэчыць нацыянальным інтарэсам нашай краіны», - падкрэсьліваюць у арганізацыі.

«Нэйтральны статус Беларусі ў дачыненьні да канфліктаў дазваляе разьвіваць Менск як пляцоўку для мірных перамоваў, умацоўваючы міжнародную ролю Беларусі ў рэгіёне, забясьпечваючы нашым грамадзянам мір і гарантыі бясьпекі», - падкрэсьліваецца ў заяве.

Пра тое, што Расея зьвярнулася да краін СНД з прапановай разгледзець пытаньне аб магчымасьці накіраваньня кантынгенту ў Сырыю для сумеснага маніторынгу ў зонах дээскаляцыі, заявіў кіраўнік расейскай дэлегацыі на перамовах па Сырыі ў Астане Аляксандр Лаўрэнцьеў.

6 ліпеня на брыфінгу ў Менску прэс-сакратар МЗС Дзьмітрый Мірончык заявіў, што Беларусь пакуль не атрымлівала афіцыйных прапаноў па лініі СНД аб накіраваньні беларускіх міратворцаў у Сырыю.

naviny.by/вс