Беларусь пастаўляе цукар у Данецк і Луганск

Гарадзейскі цукровы камбінат, які ўваходзіць у дзяржаўны канцэрн харчовай прамысловасьці, экспартуе цукар у Данецк і Луганск.

Пра гэта стала вядома, калі партал «Беларускі партызан» апублікаваў фота пакунку тавару, прызначанага для «ЛНР-ДНР».

Луганскі холадакамбінат і ТАА «Донпродрезерв» набываюць цукар, выраблены на Гарадзейскім цукровым камбінаце, але на афіцыйным сайце апошняга інфармацыі пра гэта няма, кампаніі з Данбасу не пералічаныя сярод партнёраў беларускага прадпрыемства.

Намеснік дырэктара па камэрцыйнай дзейнасьці Гарадзейскага цукровага камбінату Андрэй Бацкель у інтэрвію з „Белсатам” аспрэчыў гэтую інфармацыю: «Не гандлюем мы з Данецкам і Луганскам» – сказаў ён.

Тым часам прадстаўнік ТАА «Донпродрезерв», пацьвердзіў факт супрацы з Гарадзейскім цукровым камбінатам. «Так, працуем даволі даўно і аб’ёмы паставак вялікія», - сказаў ананімны прадстаўнік імпартэра.

Адказны за ўзаемадзеяньне з беларускімі партнёрамі Луганскага холадакамбіната таксама пацьвердзіў, што гандаль з Гарадзеяй ідзе, але адмовіўся назваць канкрэтныя лічбы.

Эканаміст Яраслаў Раманчук у інтэрвію бэльсат.эу выказваў меркаваньне, што гандаль паміж беларускім бокам і сэпаратыстамі будзе ажыцьцяўляцца «праз фірму-пракладку», каб не рабіць гэтага наўпрост. Адна з такіх фірмаў – «Белкарбатранс», якая ў 2015-16 гадах пастаўляла данбаскі антрацыт на дзяржаўныя цукровыя камбінаты. Як высьветлілася, адзін з такіх камбінатаў, у сваю чаргу, гандлюе з так званымі ЛНР-ДНР.

Belsat.eu/яс