Журналістку з Магілёва выклікаюць на допыт sms-паведамленьнем

Магілёўская журналістка-фрылансер Аліна Скрэбунова 9 чэрвеня атрымала sms-паведамленьне на нумар мабільнага тэлефона. Па інфармацыі службы маніторынгу Беларускай асацыяцыя журналістаў, невядомыя асобы прапанавалі журналістцы “зьявіцца на грамадзкі пункт аховы правапарадку Адміністрацыі Кастрычніцкага раёна Магілёва 13-га чэрвеня ў 13-00".

Журналістку выклікаюць у якасьці асобы, супраць якой вядзецца адміністрацыйны працэс за незаконны выраб прадукцыі СМІ.

Паводле Аліны Скрэбуновай, яна была зьдзіўленая, атрымаўшы такое паведамленьне ад невядомых асобаў і зь невядомага ёй нумара тэлефона. Аліна кажа, што гэта мог быць і чыйсьці ня вельмі разумны жарт. Таму журналістка параілася зь сябрамі й даслала на гэты нумар паведамленьне ў адказ.

“Калі вы сапраўды зь міліцыі, то дашліце мне пісьмовы дакумэнт з пячаткамі ва ўстаноўленай законам форме”, — напісала ў зваротным sms-паведамленьні Скрэбунова.

вясна/вс