Па Беларусі будуць езьдзіць бесьпілётныя аўтамабілі

Аляксандр Лукашэнка падтрымаў ідэю стварэньня ўмоў для выкарыстаньня ў краіне бесьпілётных аўтамабіляў. Пра гэта журналістам паведаміў інвэстар у сфэры IT Віктар Пракапеня.

«Мы выказалі ідэю бесьпілётных аўтамабіляў – трэба стварыць рэгуляваньне ў Беларусі, каб дазволіць рух па дарогах такіх аўтамабіляў, – і Аляксандр Лукашэнка не проста падтрымаў гэтую ідэю, а пагадзіўся сам праехаць на такім аўтамабілі, калі гэта будзе магчыма», – сказаў Віктар Пракапеня.

Паводле яго слоў, Беларусь можа стаць адной зь першых краін, якая падтрымае разьвіцьцё сфэры бесьпілётных аўтамабіляў, і такія машыны ў найбліжэйшай будучыні зьявяцца на дарогах краіны. «На сёньняшні дзень рух бесьпілётных аўтамабіляў не рэгулюецца заканадаўчымі актамі ў большасьці краін сьвету. Наяўнасьць такога заканадаўства дазволіць сусьветным кампаніям прыйсьці сюды і фактычна запусьціць іх на нашых дарогах», – растлумачыў інвэстар.

nn.by/яс