За тры гады ў Беларусі зьнішчана 100 тысяч дзікоў

За апошнія тры гады ў лясах Беларусі было зьнішчана 100 тысяч дзікоў, паведаміў 8 лютага на прэс-канфэрэнцыі ў Менску міністар лясной гаспадаркі Міхаіл Амельяновіч.

Ён нагадаў, што рашэньне аб зьнішчэньні дзікоў, якія разносяць афрыканскую чуму сьвіней, было прынятае ў 2013 годзе, калі ў Гарадзенскай і Віцебскай абласьцях фіксаваліся ўспышкі АЧС. На сёньня, паводле слоў міністра, у краіне налічваецца 2,6 тысячы асобінаў дзікоў.

Што тычыцца папуляцый іншых дзікіх зьвяроў у беларускіх лясах, то яны павялічваюцца, паведаміў Амельяновіч. Гэта, у прыватнасьці, тычыцца аленяў, казуль і іншых жывёл. Ён таксама закрануў тэму папуляцыі ваўкоў. Пры аптымальнай колькасьці для Беларусі 500-600 асобін на ўліку ў 2016 годзе было 1.637 ваўкоў, паведаміў чыноўнік.

Сёлета, паводле яго слоў, вядзецца падлік ваўкоў у лясах, асабліва ў заказьніках, дзе іх жыве вялікая колькасьць. „Воўк наносіць вялікія страты хатняй жывёлагадоўлі. Трэба захоўваць папуляцыю, але не ў такой колькасьці”, — падкрэсьліў Амельяновіч.

Ваўкі, паводле яго, зьнішчаюць жывёл і ў запаведніках: адзін воўк на працягу году зьядае 1,5 тоны мяса.

belapan.com/nn.by/аз