Афіцыйны Менск шукае інвэстараў

У Менску адбылася сустрэча Аляксандра Лукашэнкі з кіраўніком "ІПС Інжынірынг Кансалтынг", кіраўніком групы кампаній "ІПС Груп" Енсам Хэнкелем.

Беларускі бок прадставіў нямецкай кампаніі магчымасьці ўзяць удзел у разьвіцьці ААТ "Магілёўхімвалакно". Беларускія ўлады паставілі перад сабой мэту да 2020 года стварыць там зусім іншае, новае прадпрыемства, заснаванае на высокіх тэхналёгіях. Цяпер вядзецца пошук інвэстараў пад гэта. У Менску спадзяюцца, што заходнія партнэры дапамогуць вызначыцца з прадуктам, які быў бы запатрабаваны на рынках. Беларускі кіраўнік падкрэсьліў, што ў Менску заўсёды з вялікім задавальненьнем ідуць на сумесныя праекты з прадстаўнікамі германскага бізнэсу. Асабліва ў сфэры перапрацоўкі нафты і нафтахімічнай вытворчасьці.

У сваю чаргу Енс Хэнкель сказаў, што рады знаходзіцца ў Беларусі, якую лічыць другой радзімай. Ён заявіў, што Беларусь мае вялікі патэнцыял, і для яго будзе гонарам дапамагчы сваімі ведамі.

Магілёўхімвалакно хоча арганізаваць вытворчасьць поліэфірнай прадукцыі, у тым ліку поліэфірных тэкстыльных нітак.

Паводле Белта/юл