У сталічнай школе № 21 прама падчас урока абвалілася столь

У сталічнай школе № 21 на днях прама падчас урока абвалілася столь. На фота, якое даслаў у рэдакцыю чытач, бачная таўшчыня тынкоўкі. Паводле словаў відавочцы, адзін вучань атрымаў удары мяккіх тканак, астатнія абышліся спалохам.
На шчасьце, сурʼёзна ніхто не пацярпеў. Настаўніца вывела вучняў з кляса ў свабодны кабінэт і працягнула ўрок.

Дырэктар школы Міхаіл Савіцкі растлумачыў, што ўпалі дзьве пліткі навясной столі пад ціскам тынкоўкі.

- Упаў невялікі кавалак, ня будзе й паўмэтра. Пацярпелых няма, у хлопцаў, якія сядзелі пад абваленай часткай, ніякіх пашкоджаньняў. Мы зьвязаліся з бацькамі, кантралявалі іх самаадчуваньне. Але ў выніку ніхто нават не зьвярнуўся да ўрача.

Прычына інцыдэнту, кажа Міхаіл Савіцкі, – узрост будынка. Будынак школы быў пабудаваны ў 1940-х гадах.

Паводле словаў дырэктара, сёньня столь ужо адноўленая й заняткі ў кабінэце праходзяць. Дарэчы, летам будынак школы рамантавалі.

tut.by/вс