Замежным турыстам дазволяць наведваць Беларусь бязь віз

26 верасьня на прэс-канфэрэнцыі ў Менску намесьнік міністра спорту й турызму Беларусі Міхаіл Кравец паведаміў, што візавы рэжым для грамадзян цэлага шэрагу дзяржаў будзе адменены ўжо ў гэтым годзе. Дакумэнт аб бязьвізавым уезьдзе ў Беларусь для грамадзян краін, бясьпечных у міграцыйным пляне, ужо гатовы. Яго могуць зацьвердзіць да канца 2016 года.

Згодна з гэтым дакумэнтам, замежныя турысты, якія прыбудуць у Беларусь праз Нацыянальны аэрапорт «Менск», змогуць знаходзіцца ў Беларусі да пяці сутак без афармленьня візы. Гэтую ініцыятыву актыўна падтрымліваюць Міністэрства эканомікі, Міністэрства замежных спраў, Міністэрства спорту й турызму.

«Ёсьць некаторыя сумневы з боку сілавых ведамстваў, што натуральна, бо гаворка ідзе пра бясьпеку краіны», – адзначыў Міхаіл Кравец і дадаў, што ў дадзены момант дакумэнт знаходзіцца ў высокай ступені гатоўнасьці.

Цяпер у Беларусі дзейнічае бязьвізавы рэжым для замежных грамадзян, якія наведваюць Белавескую пушчу й Аўгустоўскі канал. Таксама бязьвізавы рэжым працуе, у прыватнасьці, для грамадзян Ізраіля, Катара, ААЭ і Кітая.

тэлеграф/вс

здымак мае ілюстрацыйны характар