Неўзабаве пройдзе пасяджэньне рады Беларускага нацыянальнага кангрэса

Першае пасяджэньне рады Беларускага нацыянальнага кангрэса адбудзецца 28 мая ў Менску. Пра гэта БелаПАН паведаміў экс-палітвязень Мікалай Статкевіч.

Такое рашэньне, паводле словаў палітыка, прыняў аргкамітэт кангрэса. «Па сутнасьці, гэта было апошняе пасяджэньне аргкамітэта, яго паўнамоцтвы пераходзяць да рады», - сказаў ён.

Рада кангрэса фарміруецца зь ліку прадстаўнікоў дэмакратычных партый і арганізацый (па адным чалавеку) і прадстаўнікоў рэгіянальных кааліцый дэмакратычных структур (па тры чалавекі ад кожнай вобласьці й Менска).

Праект рэглямэнту дзейнасьці рады, які будзе разгледжаны на яе першым пасяджэньні, прадугледжвае роўнасьць усіх яго суб'ектаў. Рашэньні рады кангрэса будуць прымацца дзьвюма трацінамі галасоў, пасяджэньні будуць праходзіць раз у месяц.

«На першым пасяджэньні рады кангрэсу мы абмяркуем яго бліжэйшыя задачы. Такім чынам, Беларускі нацыянальны кангрэс пачынае сваю дзейнасьць. У ім будзе прадстаўленая вельмі вялікая колькасьць партый і арганізацый, у тым ліку тых, кіраўніцтва якіх не падтрымала правядзеньне кангрэса», - сказаў Статкевіч.

вс